Молитва cвятителю Филарету

О, Преславне и богомудре святителю Христов Филарете, Российския Церкве светильниче, земли нашея похвало и граду Москве украшение!

Ты житием и служением твоим трием Вселенским святителем был еси подобник.
Великому Василию - яко бытие сущих изъяснил еси, Церкве Божия и таин Христовых строитель добрый явился еси, иноческих уставов быв ревностный исполнитель и покровитель;

Богослову Григорию - яко небо таинственных созерцаний о Святей Троице и о Бозе Слове сподобивыйся, сих искусный провозвестник явился еси;

Златоустому Иоанну - яко неустанный проповедник и учитель покаяния народа Божия был еси.

И ныне, вкупе с ними предстоя во славе престолу Живоначальныя Троицы и ходатайствуя о нас, моли: Церкве Российстей на камене исповедания Православныя веры утвержденней быти, стране нашей мир и единение даровати, пастырем слово Божественныя истины право правити, град Москву и паству твою от всяких напастей сохранити.

Святую обитель, идеже почивают честныя мощи твоя, по заветом препедобнаго Сергия, яко ученик его присный, добре управи, иноки в подвизех укрепи, наставники умудри, званныя к пастырскому деланию, учащияся вере и благочестию в вертограде твоем духовном, соделай избранны и достойны служения сего.

Призри с Небесе, Святителю, на ны, чада твоя, и даруй теплым твоим ходатайством ко Господу в заповедех Его нам преспевати, веру тверду, любовь нелицемерну благочестие до последняго часа смертнаго сохранити, да непостыдно предстанем Спасителю нашему Господу Иисусу Христу, Ему же со Отцем и Святым Духом подобает слава, честь и поклонение, ныне, и присно, и во веки веков. Аминь.